有冇發覺，今時今日冇咗部電腦，真係唔知點算好，而呢幾日小妹部電腦就真係「自殺身亡」，所以親身感受到同個世界脫咗節嘅慘痛經歷。
本來諗住叫個friend阿清陪我去黃金商場睇吓俗稱砌機嘅組裝電腦（嗰度咁多宅男，如果得我一個女仔去，容乜易俾人溶咗？）不過，阿清話呢排網上流傳，話嗰度有間黑店，客人買咗部砌機返去，發現好多組件貨不對辦，包括將舊型號DVD-ROM當新嘢賣、次貨顯示卡當正貨賣。我聽完都唔知講乜，真係俾人呃咗都唔知。
電腦商會會長張耀成同我講，雖然電腦舖一般砌完機後，都會一部電腦完整咁交畀個客，但其實消費者有權要求打開部機，逐一對吓裏面嘅配件啱唔啱，而每個配件都會顯示品牌同型號。佢又話，有時店員會推銷一啲功能好勁嘅配件，但如果只係用電腦上網、睇吓片，基本性能已經夠，例如2GBRAM就夠晒用，尤其呢排減緊價，只係一、二百蚊咋。不過，張耀成話如果唔係好識電腦配件嘅，都係幫趁大型、有信譽嘅舖頭好啲，又或者買原廠機，「其實價錢差唔多。」
電郵：mailto:[email protected]