味丹（2317）半年升得兩成，跑輸近磅股十幾條街，買落後，味丹抵搞。味丹主打味精產銷，呢半年嚟，味丹係咁意累積升幅21%，近磅股阜豐（546），同期一支箭爆升咗近3.8倍，味丹超級大落後。又味丹最新NAV1.3元，現價（0.56元）折讓57%，或P/B0.43倍。後邊阜豐經過呢期狂升，冇折讓之餘，P/B講緊2.4倍，講P/B，味丹吸引到痹。
味丹08年度（12月底止）純利倒退咗5成到840萬美金，但集團年度要追付一項環保水費771萬美金，先令純利倒退。簡單計數，味丹09年度撇除追收費用，純利來回已賺起番個孖，到1610萬美金，預期PE落番7倍水位。以味丹09年度預期PE10倍做目標，價見0.80元，現價潛在回報率43%；又以味丹1倍P/B做目標，價見1.30元，現價潛在回報率1.3倍。就算以呢個目標P/B衡量，味丹仍然落後幾條街。
大同冷灶燒得過
大同機械（118）最新NAV1.38元，現價0.4元，挨近4年低位，NAV折讓71%。又大同旗下聯營深圳浩寧達儀表及蘇州三光科技，上年下旬已經有計劃A股上市，可惜當時遇正金融海嘯。但A、H股上年尾到家陣勢如虹，而A股上市集資活動開始回暖，大圍環境造就，若果兩家聯營把握呢轉時機A股上市，大同家底又自然水漲船高。
Beforethat，大同NAV折讓夠吸引，冷灶一燒，短打博大同升20%到0.48元，仲未有耐到NAV水位。
錢雋