正生搬去梅窩好事多磨，要解決呢啲新界人新界事，不能不搵新界王劉皇發出手。發叔係行政會議成員，有責任打造和諧社會，佢自知身負重任，噚日周末都冇蹺埋雙手放假，晨早就去鄉議局同一大班鄉紳開會，傾足兩個半鐘頭，會後即時滙報好消息，就係承諾為正生搵其他地方遷校。
力讚新選址風水好
發叔貴為新界大地主，擁有無數物業，被譽為政界樓王之一，由「樓王發」出面幫手搵地方，八方相信必屬筍盤，真係唔啱都要睇吓，否則隨時走寶。發叔噚日果然有靚盤推介，透露已物色最少四處地方可供正生選擇，四個即搬即用嘅現樓實盤分別位於沙頭角、屯門、元朗、葵涌，萬一唔合眼緣，覺得唔啱心水，仲有長洲、沙田嘅盤可供選擇，今時今日，呢啲服務態度先得㗎！
發叔賣花讚花香，落足嘴頭話佢介紹嘅盤通通筍到痹，同梅窩南約區中學校舍相比絕不遜色，交通方便、環境優美唔在講，而且背山面海、山明水秀。嘩！呢啲尊貴地段，屬於名門大宅級數，唔起豪宅而交予正生做學校，造福毒海迷途青少年真係功德無量，發叔今次真係好介紹喎。
發叔推介嘅筍盤環境好之餘，佢仲力sell有個無敵優點，就係個個地點風水都相當好，地靈人傑咁話。新界人傳統好重視風水，邊度係風水林，何處有龍脈一清二楚，鄉議局有任何重要活動，都會搵高人擇個時辰吉日，動土前亦要大師指點迷津，祈求順風順水，家宅平安。正生有發叔關照，八方知道佢哋一定有運行。
堅持必須遠離民居
之前搬遷學校諸事不順，忽然間有咁多筍盤介紹畀正生，表面上好似任你揀，實際上卻唔輪到校長、學生話事，因為發叔講到明正生新校舍選址必須「遠離民居」，即係就算新校舍地點好似世外桃源人間仙境，講到尾都係覺得班學生生人勿近，鄉議局並非容許正生選擇搬校地點，而係由鄉紳決定流放正生去山旮旯。
正生最終落腳何處好難講，發叔承認問題唔簡單，事件「唔能夠一步到位，講兩句，解決唔到問題嘅。」慨嘆鄉議局左右做人難，「壓力相當大。」
mailto:[email protected]