部份梅窩居民反對正生書院遷入梅窩，出動小學生、幼稚園學生，睇電視新聞報導，嚇驚唔少人，乜梅窩一啲人如此不文明，簡直教壞細路。投資Ｌ睇到怒火中燒，即刻要捐錢畀正生書院辦學團體，朋友聽見，紛紛話捐，但捐去邊度？大家都唔知，因為我哋成班人平時冇留意甚麼是正生書院，經此一役，大家都覺得正生書院為戒毒成功少年提供教育機會，等佢哋嘅人生有taketwo，甚有意義，當然更不值部份梅窩居民所為，故此有意思捐錢。後來投資Ｌ都係搵番佢的另一半去搵門路，因為Ｌ太太係專業社工，比我哋知多好多。
與投資Ｌ等傾完，在街上碰到另一位投資Ｌ，前面嗰位係律師出身，轉型為公司投資董事，經常到內地搵工商企業、探聽投資機會。另一位投資Ｌ呢，本係期貨公司出身，對炒賣機制瞭如指掌，浸淫商品期貨多年，路數與第一位投資Ｌ完全唔同，為免混淆，姑且稱佢為投機Ｌ啦。
投機Ｌ話佢已經退出江湖，唔玩咯，以前孭住負資產之時，十分痛苦，好彩咬實牙根唔賣樓，如今豪宅有價，佢間屋在大坑名門對面山頭，來個大翻身，投機Ｌ鬆晒綁，十分輕鬆，但佢話九七亞洲金融風暴令不少中產階級受嚴重內傷，至今未痊癒，於九八九九年因失業而被迫賣樓者，至今生活水平仍低於九六年。孰令致之？投機Ｌ話睇到大鱷索羅斯直認不諱，講明九八年狙擊港元失敗，不勝感慨。索羅斯話根據現行規則行事，絕不犯法。投機Ｌ話：當年扯高利率至三百厘，傷害股市樓市，其實對索羅斯無損，因為三百厘係年率，索羅斯等大鱷借錢炒一兩個星期，利息支出唔算太高。如果特區政府當年真係掌握大量資料嘅話，點解唔宣佈恒生期指按金調高到七成，股票禁止沽空呢？一出呢啲招數，索羅斯走都走唔切啦，使乜扯高晒利率，害死埋樓市？索羅斯按規則辦事，金管局改規則咪得囉，八十年代亨特兄弟炒白銀，就係畀美國政府狂加孖展而整瓜嘅！或者香港金管局根本冇資料呢？索羅斯而今讚任總好波，我哋點知呢位大鱷係乜意思呀！