身為人父，一定要識呵護家人，揀車條件、揸車習慣，全部以佢哋舒服啱坐為大原則。就好似Forester咁，城市越野車種，內櫳闊落座椅軟熟，特大尾廂方便擺嘢等。但男人揸車九成睇操控同性能，借意踩油爆Turbo，盡情發揮一下副2.5LTurbo偈嘅爆發力，配合新懸掛攻彎爽利，做人老竇但又想快快樂樂過掃把佬癮，其實都好簡單。
記者：徐影龍
攝影：王文忠
Model：Gary@PureModels
體貼家人夠舒服
我未做人老竇，但絕對想像到一個已成家立室嘅男人，就算對性能有幾渴求，都唔會用作揀車首要考慮，點都係外形斯文穩重，內裏寬敞舒服為大原則。鍾意掃把佬，唔通仲揸架WRX同老婆仔女一齊劈Rally咩。Forester就活像一位體貼穩重兼有ManPower嘅父親，身為越野四驅車，外形並無過份賣弄肌肉感，斯斯文文似番架城市代步車種。未講行走時嘅實力，單睇Forester賣相，有番四驅車應有嘅硬朗，應凸嘅地方又凸得好好睇，就好似鬼面罩至下方護柵咁，一對大眼頭燈有戚眼形態，整體感覺都幾Powerful，識貨嘅，見到頭冚凸起嘅生風入口，就知架車有Turbo唔恰得，望埋掃把佬個廠徽，就連狼胎司機都未必敢連燈都唔打就亂Cut你線。
試車太多，我對黑銀白大路顏色有啲抗拒，好彩代理話港版Forester都會引入「辣椒紅」車身，聽落冷門但其實好多人Buy，未上車望落都醒神啲。設備方面，新版Forester加咗好多舊版欠缺嘅體貼設計，如電動側鏡、一按摺低後排、即時油耗顯示、地圖燈同儀錶板等，全部都好實用。要讚係行車噪音極低，可能車身離地夠高，路面同胎嘈細聲得近乎不存在，100km/h以下嘅車外風切聲，以及Turbo啟動時嘅聲浪，同樣有限，整個車廂頗為寧靜舒服，對喜愛呢類城市四驅嘅人士嚟講，換車誘因不可說不大。
彎位直路有驚喜
屋企人照顧妥當，點都輪到滿足自己。2010款Forester2.5XT剛到港，雖然外形賣相維持車系風貌，但骨子裏跟舊款比，總共有8處改動同升級，對注重駕駛感嘅人嚟講，最特別係懸掛經過廠方悉心調校，避震軟硬度前後不同，並非單純全部校硬便算，配合Subaru聞名嘅水平對向偈，做到低重心特色，加上全時四輪驅動，乜嘢時候四個轆都咁有動力，毋須像其他選擇式四驅模式嘅車咁，要等電腦出Order先切換，入彎反應快人一步，令到新版Forester嘅彎路表現更出色。
實地試揸，諗住車身高，入急彎預咗輕微「波Out」，不過實際情況比想像中更好，只須算好速度收油，就算急入90度彎都仍然咬地，畀到我一種穩陣可依賴嘅感覺，最有驚喜係扭力同頭段爆炸力，本來230匹唔算少，但屬較重嘅越野四驅車種，對速度感點都有啲保留，不過喺大直路由慢車到地板盡油，波段直飆間，轉數同車速都升得流暢但好有力，最重要係TurboLag唔明顯，噪音又極低，輕盈感覺如揸緊四門房車般，呢點令我覺得幾有驚喜。
規格
引擎：2,457ccDOHC+Turbo
馬力：230ps/5,200rpm
扭力：32.6kg-m/2,800rpm
傳動：4前速自動波，四驅
售價：$259,890
查詢：Subaru陳列室（25112727）
贏Subaru禮品贈父親
Subaru香港代理「意美汽車」喺父親節搞咗個「父親喜愛Forester的理由」徵文比賽。只需寫150字，講出Forester有乜特色最啱爸爸，代理會揀選寫得最好嗰5位獲獎，頭獎有價值$1,419嘅原廠Subaru世界越野車隊（SWRT）運動袋，另4位特別獎就各得原廠SubaruSWRT或STI大毛巾一條，每條價值$428，全部都喺Showroom明碼實價咁賣緊㗎，做父親節禮物夠晒心思。
參加辦法
1.參加者須將作品電郵至mailto:[email protected]，列明「父親喜愛Forester的理由徵文比賽」。
2.截止時間為今天（6月21日）11:00pm，逾時作廢。
3.作品須附上真實姓名、聯絡方法及身份證英文字母連頭四位數字，以便核對身份。
4.「意美汽車」對賽果保留最終決定權，參加者不得異議。《蘋果日報》亦概不負責。
＊得獎名單將於6月25日於本版內公佈