波浪許上星期打電話嚟約去賀菊食日本菜，當時股市氣勢如虹，直撲一萬九千點，左丁山對佢講：「你呢位大淡友一定畀人鬧死，成日唱淡，因住至好。」波浪許話：「未驚過，不過我賣咗間公司之後，日日好得閒，唔知做乜好，出來傾吓偈啦。」點知到咗食飯之日（星期二），股市繼續下跌，上午跌咗五百五十五點，跌破一萬八！報17943，於是吃飯之時，波浪許又試繼續唱淡，佢話：「你以前做過銀行貸款，現在考吓你。有一間公司問你借款兩萬，無抵押。公司業績係：去年營業額十四萬、二十年累積虧損而負債金額十二萬，未來兩年估計虧損三萬，未來十年估計虧損十萬，已發出遠期支票五十萬。你借唔借？」
儍嘅咩，有咁嘅客戶上門，即刻叫佢去搵政府申請中小企貸款擔保，等納稅人孭飛啦，再唔係就勸呢位客戶申請破產。波浪許哈哈大笑：「你將十二萬、十四萬、五十萬等等後面加上三隻字，就係『億美元』，你就知道世界大勢啦！」
咪變成十二萬億美元？即刻知道敢膽孭上如此大數目債務者，全世界只有一個，就係美利堅合眾國。美國噃，如果美國提交中國上述資料，伸手問中國攞兩萬億美元，然後印兩萬張，每張面額一億美元嘅債券，交畀中國，中國制唔制？美利堅公司就一定唔得，美利堅國就有商量，日本話對美國債券有不可動搖的信心、俄羅斯話美元具備不可代替的地位，中國敢唔敢公開說不呀？
當今世界經濟弔詭之處，令人難以捉摸，美國負債纍纍，遠超審慎水平，正是大有大炒，小有小賭，唔服氣存款利率接近零厘嘅，唯有跟住賭一鋪，眯埋眼叫一聲，去也！索羅斯咪一樣叫人小心謹慎，一路猛下賭注。索羅斯睇中中國，大做公關，接受中央電視台訪問，講及市場沒有道德不道德之事，只要參加金錢遊戲，買賣股票、期貨、外匯等，就要按遊戲規則辦事，唔好同人講道德。央視記者問：「有人叫你做狼（wolf）……」索答：「仲有，係鱷魚！」記者：「你有何感想？」索答：「做動物仲好，我用兩條腿走路，成日背脊痛，動物有四條腿，唔會有背痛……」如此人物，賺夠錢就捐去畀東歐國家搞民主運動，你說他道德不道德，佢毫不在乎。