挾住地鐵救火英雄兼前AO之名勇闖政壇嘅季詩傑首次參選，聽日同民建聯鍾嘉敏喺灣仔鵝頸區補選一決高下。社民連噚晚喺時代廣場外舉行造勢晚會，有成300人參加，該黨群雄盡出，毓民、長毛、陶君行等撐足全場，前區議員李繼雄冇露面為阿季站台，係意料中事。
季詩傑陷苦戰
雖然李繼雄冇現身，但唔代表佢唔幫手過票，據知社民連建議李幫忙致電區內選民，希望可打動一啲民主派支持者出嚟投票；加上公民黨陳淑莊近日頻頻落區助選，相信有助選情。據社民連內部分析，07年李繼雄空降也可當選，顯示呢區有唔少民主派fans，只是今次補選氣氛不熱烈，選民投票意欲不高，所以阿季一直陷於苦戰，反觀民建聯有鐵票在手，而且動員力強，贏面無疑較高。
話雖如此，八方從建制派方面得到消息，指民建聯不敢輕敵，評估後認為形勢拉鋸，所以拉票不放軟手腳，早前更邀請「精英大師」馬主施雅治拍短片助選，希望發揮名人效應。