亞視女藝員筱靖近期憑性感及寸吳亭欣做第三者出位，但昨日本報接獲讀者報料，大爆有口話人的筱靖公然爭仔，曾介入黃澤鋒與未婚妻的戀情，又指她綽號「波板糖」，最叻嗲男人，是典型拜金港女。黃澤鋒昨則直認當年落D媾筱靖，並大讚她身材好。
吳亭欣（LuLu）因與已婚商人馮潮澤傳緋聞而被亞視雪藏，24歲的筱靖吼吳亭欣失勢，隨即拋胸及寸吳亭欣做第三者博見報。昨日本報接獲自稱LuLufans的讀者大爆筱靖私生活混亂。
筱靖被報料者指沒資格指摘別人是第三者，因她也是過來人。原來筱靖在數年前曾搭上現年41歲的男藝員黃澤鋒，當時黃澤鋒與女友Winnie尚未分手，但同時間與林家棟前女友阿池及筱靖過從甚密，筱靖和阿池為爭黃澤鋒打交，最後筱靖成為這段四角戀的贏家。報料者又指筱靖有一不文花名「波板糖」，中學時代與TB拍拖，後來則喜嗲男人、愛點男人送禮，並質疑她隆胸。
Disco相識
本報昨獲得筱靖與黃澤鋒頭貼頭的親密照及她與中性打扮女友的合照，記者昨向黃澤鋒求證兩人關係時，他表示自己於04年跟Winnie分開，之後他結識一名女友，但非林家棟舊愛，他與女友分開後才與筱靖一起，黃澤鋒說：「我係05年暑假喺disco識筱靖嘅，係拍過好短時間拖，之後佢返加拿大就冇咗啦。」會否跟筱靖再續前緣？他笑說：「冇啦，佢咁後生，我咁老，家事業為重。」至於筱靖被指隆胸，他則笑說：「我睇電視唔覺，佢身材好好㗎，個人都唔差。」
口供不一致
筱靖昨在電話中承認花名是波板糖，又承認與黃澤鋒拍拖，但兩人口供不夾，她說：「我03年同佢拍拖，拍咗3個月。嗰時我知黃澤鋒同林家棟個前女友阿池喺過一齊，阿池仲打嚟問我係咪同黃澤鋒拍拖，但黃澤鋒同我講，話同阿池分手之後至同我一齊。」黃澤鋒舊愛Winnie昨被問到是否曾被筱靖介入？她在電話中說：「我唔知筱靖係邊個，我好多嘢唔記得。」
此外，日前筱靖和亞姐陳莎到深水灣戲水，兩女齊齊穿三點式晒身材，互相推油甚為火辣，陳莎對筱靖的豐滿胸部更大表羨慕。筱靖揚言甚滿意自己身材，但自爆曾被人博懵，她說：「我試過搭車俾人眼望望，我會用好兇嘅眼神望佢，又試過搭火車時被人揩patpat，後來屋企人買咗部車畀我，家少搭咗公共交通工具。」
採訪：林妃、比華利
攝影：陳俊強
