甚麼是正宗大食懶肥貓？眼前的Biru正是貓辦，牠只愛吃與睡，連玩都懶。每朝，牠會爬上主人床，狀似叫醒主人上班實則討吃；吃飽，又睡，睡夠了，又喵喵喵的守候在門口，狀似迎接主人回來，實則嗲主人快快開至愛的雞肉罐頭。罐頭一開，搖頭擺尾，要手有手，扮狗加Liedown也在所不惜，吃飽了，再睡……
記者：蒙為亮
攝影：楊錦文
Profile
姓名：Biru
性別：男（1歲）
品種：美國短毛貓
特徵：懶惰、好色
興趣：吃、睡、玩水洗白白
扮未開飯
11磅肥貓仔主人Gin，一年前從配種師處買Biru回來，那時Biru4磅不足，現在已經變成超磅肥貓，Gin承認這是太溺愛之過：「唉，佢有今時今日咁肚滿腸肥，幾乎連走都走唔郁，都係因為我太錫佢，食量方面可能太多啦。初初帶佢返屋企，見佢咁開胃，咪畀多啲佢食囉，點不知佢唔停口，家肥到幾乎行都行唔到！」言談間，為食Biru又在主人身邊爬來爬去，一副吃不飽的樣子。為討吃，主人一叫：「Liedown。」牠就會如狗般趴低，非常趣致。「情況就好似佢表演完俾你睇，要收番你入場費一樣。如果你唔畀食物佢，佢真係睬你都儍；餓佢一排咩，你叫佢畀手就畀手，扮狗就扮狗，仲經常扮無食過嘢，走埋我身邊乞求食物，所以我覺得佢其實好聰明。」貓似主人型？Gin連忙耍手擰頭：「我無佢咁為食！」Biru除乞求食物外，其他時間都處於懶到出汁狀態：「有時我去朋友屋企，見到其他貓仔就算唔同人玩，都會自己同自己玩，Biru就完全唔會，平時最鍾意郁都唔郁，一味瞓覺，最大運動量，就係冲凉玩水。」確實奇怪，一般貓仔一聞洗澡，九成變臉閃人，但眼前的肥Biru，洗完澡後，靠在浴缸邊擺出一副很享受的樣子，看着水完全流走，才捨得離開浴缸，「係，佢就係咁，真係唔知好嬲定好笑。」
捽肚腩減肥
現在1歲的Biru已經有11磅重，雖然暫時無病無痛健健康康，但獸醫說過：「貓仔太肥始終唔係好事，老來只會百病纏身。」Gin只好忍心替Biru進行減肥大計，第一個任務就是減掉晚餐份量，由一罐雞肉減為半罐：「無辦法，佢唔玩玩具又唔理我，做運動呢招行唔通，惟有Cut佢晚餐，起初見佢唔習慣，成日喵喵聲嗌肚餓，頭一兩日真係好唔忍心，我直接同佢講：『我都係想你健健康康啫，唔好嬲我啦。』佢又真係好似聽得明咁喎，食少咗，家陣仲乖咗㖭，我都明，貓無可能聽得懂人話，我心理作用啫。」當然是心理作用了，不過那個主人未試過和寵物說話？這就是養寵物的樂趣吧。
閒時，Gin會為愛貓按摩推拿，通不通到淋巴不知道，但一捽其肥肚腩，Biru卻是一副冧樣：「這是我自創的捽肚腩減肥法，每晚定時定候，我就會捽佢肚腩仔，用咗呢個方法，Biru上星期上磅輕咗足足3磅，呢招應該有一定成效。」人可以捽肚消腩，貓也可以？如果可以，我就不用食減肥藥了，Gin，來捽我的肚腩吧……
爬窗目及女
「世上那有一隻不吃魚的貓？」這句說話，往往用來形容那個男人不貪戀美色。Biru不吃魚，但一樣有色心，除洗澡外，Biru最大嗜好就是靚女，主人返工，百無聊賴的牠獨自留在家，不開雪櫃偷吃，卻會跳上窗台，偷街邊靚女，「佢唔止鍾意睇靚女，仲好八卦，外面一有乜聲，就會跳上窗台左望右望。就係因為Biru太八卦，又爬得太近窗口，所以我先裝窗花，怕佢失足墮樓。」
不過八卦Biru都有樣好，就是不怕陌生人，個性平易近人，我多手摸摸牠，牠沒有多大反應，瞄也不瞄我一眼，我明，牠對我這個滿臉鬍鬚的男人沒多大興趣吧！「係呀，女仔抱佢，佢會熱情好多，鹹濕貓一隻！其實佢唔係想像中咁平易近人，幾個月前仲好鍾意出爪傷人，有次差啲連我都抓傷，所以每次出爪前，我都打佢PatPat，打得多，佢都漸漸無火，家連出爪都懶，又係郁都唔願郁。」有想過為Biru找個伴嗎？「當然有啦！幫佢搵番個好伴，等佢唔使成日咁自閉，又要慘到坐喺窗邊睇女，不過都要等佢減肥成功先算，你有無好介紹？」Biru有意無意的喵了一聲，瞄着我，好像知道我們正在說牠壞話似的。
懶貓私相簿
