立法會噚日宴請特首、高官同行會成員食午飯，係促進行政立法關係嘅例行公事，煲呔噚日心情似乎不俗，到場後同議員有傾有講，絕無黑面，仲好講得笑㖭！
禮賓府做借債推薦人
社民連素來係呢種畀面派對稀客，噚日佢哋兵分兩路，長毛在場外抗議，要求煲呔帶頭同全體問責官員減薪25%；陳偉業則深入「虎穴」，在場內招呼煲呔，不過佢冇掟生果，而係向煲呔陳情，指有唔少俗稱「財仔」嘅財務公司，以滋擾性手法向債仔「推薦人」追數。欠債還錢天公地道，可惜有時推薦人都唔知被擺上枱，無辜受累好寃枉，點知煲呔聞言後竟然話：「你叫佢哋以後寫禮賓府係推薦人囉！」
陳偉業話煲呔竟然願意孭起條數，令佢愕然，特首咁講，八方直情有衝動立即幫襯財仔。煲呔之前嘅六四言論不代表我，但如果大家有需要借錢，推薦人或擔保人一欄，大可寫上「曾蔭權代表我」，睇吓財仔有乜反應。
張文光則話煲呔無厘頭問佢點睇中國歷史必修呢個問題，張文當然舉腳贊成，更指課程應該包括六四史實。煲呔讀書時歷史科肥佬，曾亂噏極端民主變文革，對六四歷史嘅觀點更加令人吃驚，唔通佢痛定思痛，終於想從歷史吸取教訓？
16月大孫女開始食齋
近期興抱孫，煲呔噚日都同人分享湊孫心得，佢話16個月大嘅孫女好精靈，近期仲開始食齋，因為新抱覺得健康啲，做阿爺亦唔反對，但佢就冇興趣跟食齋，因為自己身體向來健康，仲話：「另一位曾生（曾鈺成）就好似有啲咳。」議員林健鋒透露同煲呔討論玩具問題，唔係出口量跌、原材料價格呢啲大事，而係今年有乜新款玩具，「曾生話佢拎住架車仔，就可以同個孫玩半日。」
至於另一焦點、「候任」金管局總裁陳德霖飯局時一味同保皇黨議員密斟。勞工界李鳳英席間忍唔住批評陳德霖，指佢一手搞出嚟嘅副局、政助，表現同公眾期望有好大落差，有啲人更狀似透明冇人認識，市民覺得浪費公帑。英姐話醜婦終須見家翁，奉勸班友好自為之，據講陳德霖冇特別反應，唯唯諾諾就算。
mailto:[email protected]