初戀韭菜餅　食到噴

我不是個不知廉恥的女人。但面對一眾同業，同度台北4日後不分男女個個大住個肚身心俱疲回來，還有上回跟他去完曼谷都搞到粗身大細的同事L，我不能不在此申訴，始作俑者是那個唔多少年的少年食神──Michael！心邪嘅你係咪以為又有單認祖歸宗豪門恩怨的古仔睇呢？係就係死，不過係食死、飽死、肥死同滿足死！

記者、攝影：陳慧敏
鳴謝：新華旅遊、泰國國際航空、台灣觀光局

古爐烤餅法

繼上次曼谷午夜豪隊5碟海南雞飯後，今回我們跟Michael回到他的半個故鄉─台灣。因Michael媽媽是新竹人，小時年年暑假回台灣，甚麼是街頭小食、兜痞小店風味，他最清楚。「起到身嘅明早7點半大堂等，不見即散。」這是我們掃了師大夜市，食到眼定定後Michael下的通牒，他食硬這家店賣傳統韭菜餅小店。
「重點係個焗爐，我找遍全台灣，還沒見到有人用這古老爐子烤燒餅。」至誠開店35年，已做到第二代，那碗鹹豆漿用美國進口黃豆，加油條、白醋、醬油、葱花跟辣油，米漿是混入炒過的雲林花生，與在來米（即本地米）一起研磨。而那香脆鬆化的酥皮燒餅，全台只此一家，秘密是酥油用麪粉和橄欖油炒過，叠幾層再烤，夾住蛋餅加條油炸鬼食，每咬一口，酥皮鬆化如雨下，食到一身係。

■韭菜盒子裏有粉絲、蛋皮、蝦皮及黑胡椒，銷量No.1。

■咬一啖，餅碎跌到一地係！

■酥餅美女搓餅4年，外剛內柔的餅出自她手。

人氣餅日做70

我從來不吃韭菜，但受不了成班人色迷迷住我那半塊未食的韭菜餅，於是逼住淺嚐一口，咦，唔臭喎！因韭菜新鮮，切段不切粒，咬下去帶點絲的新鮮質感。那盒子外脆內軟，一點都不油，食時仲會狂噴餅碎，用手接都接唔切。我想食多件，「沒有了！」吓？現在8點半咋喎！「我哋得一個爐，一日最多弄70件，你想食，六、七點要來啦！」唓！

■間店真係好兜痞㗎。

■一個爐每次燒10塊燒餅，手快有手慢無！

■汪伯伯朝朝來吃：「我愛吃那韭菜盒子。」

至誠豆漿坊

地址：士林區至誠路一段2-4號
營業時間：5:00am-11:00am

殺人魯肉飯

3個人，叫了7個人吃的飯？食完早餐韭菜餅，Michael還未滿足，他日念夜念，就是這間老店的魯肉飯。已有40年的胡記，最出名是台灣傳統小食米粉湯。以大骨煮湯，那鍋萬年豬骨混米粉的湯，還有那些用來煮湯、又乾又硬的粗米粉給煮到發脹，加上甚麼配料都丟進去，時至今日已煲到奶白色了！但我更愛那碗用台灣在來米煮的魯肉飯，飯質香軟煙韌，淋上以肥腩肉跟豬油煮成的惹味肉醬，灑點葱花，半片日本黃蘿蔔，噴着白白的炊煙……這是滿碗的膽固醇，簡直是自殺之米粒，但呷着那香滑細膩的感覺，腦海中突然明白為甚麼蔡瀾跟肥韜兩老，都為這碗肥油將生死置諸道外。話明「今晚唔食咁多住」的Michael，喺我哋掛住影相扒飯之時，自己已開人飯煲添多5碗了，唔數碗，真係無人知。

■那一大鍋米粉湯加油豆腐，就放店面當眼處。

■肝是用小豬的，原來新鮮豬肝吃起來沒有腥味。

■個個又話「試少少」算，結果一食就淪陷了……

胡記米粉湯（第三分店）

地址：中山區林森北路283號
營業時間：12:00nn-6:00am

永不熄火牛肉麪

同台灣的士司機講要去林東芳，等於同佢講要去皇后像廣場，沒人不懂這家只得一個窗口幾張枱，門口總是泊了名車、的士或貨車仔，人多的就被迫到幾個舖位外，坐唔夠30人的半路邊攤。《不良笑花》裏的潘瑋柏每次去錄音路過都要食一次；馬英九逢在國民黨中央辦公室OT都食佢。這裏的招牌菜是牛肉麪，那碗牛肉湯開店30多年來24小時不熄火，切成薄片的牛肉跟腱子心都燉得香軟而不爛。但最巴閉的，是那幾罐放在枱上任食任取的自家製辣醬。那是將牛肉湯跟辣椒相混，用細火慢慢熬成的精華油，普通一碗牛肉湯，沾了都可以好食到曉飛！你唔記得落？俾人笑㗎！