林峯處男演唱會前晚在紅館舉行最後一場，不少無綫藝員包括苗僑偉和老婆戚美珍、歐陽震華、甚至利孝和夫人也有捧場，曾傳緋聞的馬德鐘及郭羨妮也同場，不過馬德鐘就和老婆同行。當晚楊千嬅繼續做嘉賓，男友丁子高就在台下。
千嬅上台時笑說：「點解搵我做嘉賓？大把人適合同你做情侶。」林峯聞言反駁：「咁你呢？幾時畀乜嘢（喜帖）我？」千嬅扯開話題說：「下次我去廈門做演唱會搵你去，你係廈門公子。」
接着到蔡卓妍（阿Sa）出場，她笑說：「頂唔順，好暈，唔可以望你多過10秒。」林峯同樣以阿Sa戀情搞氣氛：「外傳你避上某個節目？」阿Sa反擊說：「外傳你有個朋友唔得閒嚟，所以益我，好似姓鍾。」林峯即謂：「好似姓鄭喎。」
自評80分
至尾聲和眾女模水池激戰時，林峯有幸大嘆「波餅」，但訪問時他堅稱感覺不到。至於緋聞女友鍾嘉欣始終未有出現，林峯表示對方有送花籃祝賀，並自評表現有80分。
採訪：王連連
攝影：陳順禎、陳俊強