家啲手機功能多多，小藍最受落嘅當然係一機在手，可以聽歌睇相同上網睇戲啦。效果雖然唔夠屋企嘅影音器材咁好，勝在隨時隨地止吓咳。消委會老友話，佢哋啱啱測試咗27款新手機，包括9部智能手機、7部3G手機同11款GSM手機，進行基本功能、音樂、照片、上網及同步等多項測試，睇吓邊部機最掂。
老友話，以總評分計，智能手機得分最高依次係諾基亞5800XpressMusic、LGKC910Renoir同諾基亞N79；3G手機排名首兩位係新力愛立信嘅W705、W595，第三係諾基亞5320XpressMusic；GSM手機方面，LGKP500、KS660包辦頭兩位，三星D988排第三。
留意網絡商收費
老友話都知小藍好注重手機嘅音樂表現，評審透過立體聲耳筒嚟試聽音樂質素，同埋試吓聲量調校及播放歌曲介面嘅操作方便程度，以至下載音樂時方便程度等評分，結論係諾基亞嘅手機最靚聲，包括5800XpressMusic、N79、N85同5320XpressMusic。當中5320XpressMusic嘅網上功能得分都好高，可以全螢幕播放網上影片。
老友又提醒話，家唔少手機支援HSDPA3.5G上網，數據傳輸速度比普通3G高速好多，所以上網瀏覽網頁、收發電郵、即時通訊、下載影片都好快，但使用有關服務前一定要詳細了解網絡商嘅收費計算方法同服務條款，以免收到賬單見到銀碼大吃一驚。