人生有幾多個十年，梁漢文（Edmond）也可說得振振有詞，出道逾20年，高峯攀過、洞底也探過，更試過淪落到賣車解財困，低處未算低。婚姻令Edmond重燃鬥志，更揚言將目標放在最受歡迎男歌星，只等待唱一首不再悲情的歌，然後在頒獎台上向Paco說一句多謝。 撰文：李珮洳
講老婆 甜到漏油
梁漢文靚聲人所公認，他唱的經典情歌也令人印象深刻，當中包括《纏綿遊戲》、《傷了三個心》、《衣櫃裡的男人》等等，每一首都將失戀被飛的心情唱到肉，失戀的人聽到一定會感到歌詞句句入肉。不過Edmond自己也不明白為何作詞人都喜歡寫一些慘情歌給他，他說：「乜我個樣似俾人飛咩？我都唔知點解係要唱呢啲慘歌先至hit，本身感情生活唔係咁㗎，不過都好開心呢啲歌咁受大家歡迎。」
難忘燒着廚房
去年尾跟女友林文慧（Karen）拉埋天窗後，Edmond終於可以洗底，新碟第一主打歌《住家丁麵》唱出新婚生活的喜悅心情，他說：「今次首歌係吳國敬作畀我嘅，原來佢一早就預咗畀我唱，呢首歌唱出新婚後嗰種甜蜜，而且我真係好鍾意食即食麪，所以我好鍾意呢首歌。」談到即食麪，他即忍不住踢爆太太Karen入廚的烏龍事，原來太太有如《美女廚房》的地獄廚神般，曾經火燒廚房，他笑着說：「有一次老婆──當時係女朋友啦，佢話煎腸仔畀我食，點知佢又掛住煲電話粥，落油又唔知落多咗。我喺廳突然聽到好高key嘅尖叫聲，衝入廚房已經見到個鑊着火，我於是就拎張棉胎去冚住，點知成個鑊拖咗落地，真係好狼狽。」
念恩情 永記於心
講太太瘀事時嘻嘻哈哈，談到唱片公司的人事變動，Edmond即收起笑容，對於陳輝虹上任主管唱片部，黃柏高（Paco）轉戰電影部，他對Paco當年的提攜仍銘記於心，他說：「記得當年自己發生大件事，最低潮嘅時候，係Paco同我講做人要有目標，要我每年set一個目標畀自己，係佢教我唔可以放棄自己。結咗婚之後我嘅奮鬥心更大，我已經set咗目標畀自己，今年未必達成到，就係喺未來攞最受歡迎男歌手，可以成為做呢行做得最耐而得到呢個獎嘅男歌手。」Edmond口中所講的低潮期，相信就是他年前財困，連保時捷也被拖走一事。
Edmond更許下承諾，他日真的上台領獎，他第一句說話必定是：「多謝Paco。」對於古巨基已得到無綫《勁歌》的最受歡迎男歌星獎，問Edmond會否感到酸溜溜？他說：「Paco睇時機係睇得好準，呢兩年基仔遇到好多好歌，嗰個時間係喺基仔身上，總之Paco會為歌手爭取最好嘅嘢。」
以往Edmond的是非甚少，不過今年因為基仔轉投新公司又遲遲未公佈，引來鄭中基抨擊他搞是搞非，事後Edmond又以鄭中基的立場加把嘴，怎料事後因為「幫口」而被列入太子黨。
後悔口多惹禍
對此Edmond感到相當無奈，他搖搖頭說：「當日本來要入廠錄《美女廚房》，同事叫我出去傍一傍做訪問，點知我入咗戲，用咗節目嘅搞笑形式講咗兩句，點知出嚟件事咁大。總之以後如果件事唔關自己事，我唔會回應啦。至於太子黨呢個問題，我想話我同鄭中基識咗十幾年，到《美女廚房》就熟咗，一路同佢都係好朋友，唔係大家所講邊一黨、邊一派。」相信Edmond經此一役，一定領悟到禍從口出這個道理。
攝影：陳俊強
髮型：Moe（Chin.G）
化妝：HettyKwong
服裝提供：Initial
場地提供：國金軒
