手藝了得又細心的擦鞋老師傅，在香港買少見少。53歲的劉永明，93年開始擦鞋謀生，16年來風雨不改地從黃大仙家中出發，到中環戲院里擺檔。他說，自己20多歲時十分反叛，曾參與打劫等不法活動，入獄11次，屢留案底。但人越大，越開始為前途着想，「良心發現嘛！大個仔就想做番個好人。」他試過做地盤和搬運，但工作不穩定，最後輾轉在朋友介紹下入行做「擦鞋仔」。
擦鞋有秘技
永明叔指出，擦鞋有一定技巧，首先要把鞋上的塵土抹乾淨，再以棉花球塗上鞋油，把它「捽到立立令」，然後用鞋擦和乾淨的布把鞋油抹乾再擦亮，最後把鞋油及水混合，再用棉花球塗抹一次，舊鞋也煥然一新。那一般人在家中擦鞋可否做到這樣的效果？永明叔說︰「啲秘技梗係唔話你知啦！係人都知我仲使做生意？」
永明叔一邊擦鞋，一邊慨嘆以前生意多，很多外國客人光顧，但近年經濟不景，顧客越來越少。現在他一天只有200多元收入，只夠餬口，下雨天更是「得個擺字」，惟有「好天斬埋落雨柴」；加上食環署頻頻檢控，令他生活百上加斤，「一星期嚟冚兩次，加埋罰3,000蚊，仲收埋我啲工具，根本搵唔到食！」於是，永明叔07年10月去信特首辦，要求政府放他一馬，並且應關注擦鞋這個夕陽行業的前景，但特首秘書書面回覆他時，只表示交由發展局跟進，其後不了了之。
最近他得知食環署可能重新發牌，2,000多元的一年牌照費尚可負擔，「俾佢抄兩抄，都冇咗3,000蚊啦！」
本報記者