上世紀九十年代初英國曾經歷經濟上一段黑暗時期，英鎊被國際大炒家索羅斯狙擊至嚴重貶值，被迫退出ERM，當時利率高企，失業率上升，消費力疲弱。全英國主要購物區之大型百貨公司，離不開馬莎、Boots、BHS、Next、Dixons等連鎖店舖，主要城市購物街都叫做HighStreet，貨物具特色之小店亦有其生存空間。
在經濟正常運行情況下，每年慣常應該只有兩次大減價，夏季和冬季大減價，而且經濟越好，賣正價時間越長，減價時間亦會隨之被推遲至季尾或更後，皆因減價旨在清理存貨。然而當年嘅春天，即係狙擊英鎊一役，英國經濟有如俾人趁火打劫嘅一刻，竟然出現春季大減價，甚至mid-SpringSale、mid-SummerSale、mid-AutumnSale，換言之，全年勁減，表面上生意做多咗，但錢就賺少咗，皆因人人慣性等減價才出手。
零售業未感受暖意
今年英國經濟再受環球金融危機打擊，首季經濟按季萎縮1.9%，創自1979年戴卓爾夫人上任以來新低，失業率達7.2%，創12年最高，長達32年樓市上升期壽終，連中國人開設普遍被稱為「雜碎舖」之外賣店，亦深深感受到這份前所未見之蕭條氣氛，皆因連大型百貨連鎖店馬莎百貨，都推出一款10英鎊包頭盤沙律、主菜、甜品及紅酒之晚餐套餐系列，實行與餐館外賣店搶爛市。
點知這款便宜套餐好受歡迎，外賣店根本無得鬥，反映生意有幾難做，大機構以本傷人其實自己都好傷，不過勝在上咗市有本錢。近期大家好似響沙漠行得耐，開始見到海市蜃樓，講話經濟已見「嫩芽」（GreenShoots），呢類字眼跟前年大家講話新興市場可以跟美國分道揚鑣（De-coupling）咁，好快自己未講到厭，人哋都聽到厭，連馬莎作為英國最大服飾零售連鎖商都話目前見唔到咩嫩芽。
就算當地零售銷售連升兩個月，站在經濟寒暑表最前線嘅零售業，依然感覺唔到一絲暖意。銷售回升，只屬天氣回暖的短暫好景，大部份客戶就算今天仲花得起，都只係局部有取捨地勒住嚟使錢，形成局部消費向好，大圍仍然向淡的攤薄現象。
唔食外賣食馬莎套餐，有人得以保住半壁江山，原來要犧牲更多人之利益。內地家電與汽車下鄉亦同時出現攤薄，下周再談。
胡孟青