前瑞銀星級分析員陸東（Andrew）最近做咗華保亞洲（810）嘅顧問，今個星期佢仲現兜兜攞咗幾千萬銀做埋佢哋第二大股東。根據聯交所資料，Andrew今個星期二喺場外以現金每股0.27元買入1.7億股華保股份，即係使咗4590萬銀，唔計上星期獲分到嘅4500萬股認股權，佢嘅持股量只係僅次於大股東嘅1.76億股，若佢行使埋嗰4500萬股認股權，持股量就會增加到2.15億股，隨時做埋大股東。
斥4590萬購1.7億股
Andrew同華華講，今次係佢私人投資，同佢私人搞嘅基金無關。Andrew做顧問嘅消息上星期曝光後，已刺激華保亞洲股價飛升，噚日收26.5仙，由上星期四17仙起步計，足足升左超過五成。雖然Andrew買嘅1.7億股家賬面蝕緊85萬，但佢手上批認股權，行使價只係17仙，即賬面仲賺緊428萬銀，夠冚有餘。
華保主要投資上市同埋非上市嘅股本證券，舊年仲蝕緊4500萬銀，投資了得嘅Andrew肯真金白銀去投資，相信有佢嘅理由。