女怕嫁錯郎，男怕入錯行，搵工、轉工唔同買棵菜，八方相信正常打工仔跳槽前，都會諗清諗楚先返新工，是以前日傳出西九文化管理局行政總監程少泉突然劈炮消息，政府上下政圈內外都好愕然，因為程少泉願意減薪由商界轉職公營機構，誠意十足，如非受到好大委屈，唔會上任僅七日凳都未坐暖就起身，辭職肯定事不尋常。
工作同預期有落差
由於程少泉七日情玩完實在太戲劇性，佢被逼走傳言不脛而走，矛頭直指主管西九嘅民政事務局副秘書長朱曼鈴Cathy，有文化界人士話程少泉辭職係意料之外，情理之中，「朱小姐咁掗拃，行政總監點會做得長吖！」
Cathy被視為特首煲呔愛將，近年頻頻升職，最近由首長第三級D3直升第四級D4成為官場美談，好多人相信佢再上層樓指日可待。Cathy在事件中扮演甚麼角色，唔同人有唔同看法，有官員私下稱，Cathy身為西九文化區辦公室主管，睇實啲個project係份內事；來自西九管理局消息則稱，可能有人返工後，發現同預期有好大落差，所以當機立斷遞信。
西九管理局主席係政務司司長唐公子，但佢不可能處理日常事務，呢啲嘢交由Cathy睇，了解管理局運作人士指，如果有人要求行政總監向佢滙報工作，而總監卻認為大家咁高咁大平起平坐，對口單位應該另有其人，雙方衝突在所難免，冇人肯讓步的話，結局自然係有人要起身。
西九聯席黃英琦同八方講，對程少泉突然請辭消息唔覺得奇怪，直指係官僚思維，任用唔識文化藝術嘅官員作主導嘅後果，「請個人返嚟，又唔放開手畀佢搞，無可能成功。」佢建議立法會應要求當局解釋事件來龍去脈，同時盡快聘請行政總裁帶領西九上馬，「唔好再畀官僚搞禍件事。」不過另一文化人胡恩威認為要先搞清楚西九發展方向才請人，「都未知想食乜餸，點知應該請乜嘢廚師呢？」
實際上請人都急唔嚟，西九管理局最快月底討論重新聘請行政總監，按時間表可能同聘請行政總裁同步進行，估計最快明年先有着落，不過西九拖延多年，唔差在拖多幾個月啦。
mailto:[email protected]