有時散戶唔怕股市升跌，因升市可炒股，跌市亦可沽期指，只要自己睇得通，點都有機會賺錢。最怕反而係市場普遍輿論都認為港股後市關鍵在17710支持，但偏偏昨日港股跌至17776收市，若然純睇指數而決定去留之散戶，咁嘅情況究竟可以點做？
把握食糊機會
假設港股今日大幅裂口低開，跌穿支持位，咁係咪代表要沽貨撤退？其實，散戶炒股最重要係隨機應變，若然認為大市跌勢已成，短期難以扭轉，倒不如早一步撤退好過，大棚人等個市到位至肯沽，到時沽壓肯定加重，人踩人仲濕滯。炒股唔可以一板一眼地行事，否則好易出事。
港股本月首次收市低過萬八點，形勢要注視。個別股份雖仍見炒作，但為求心安起見，建議散戶手上股份有利可圖者，何妨沽貨享受一下賺錢之樂。
華晨（1114）昨日逆市升5.7%，收報1.12元，最高曾見過1.18元；股價走勢咁強，因市傳華晨獲同業一汽及廣汽等覬覦入股，只怕成事即變成「好消息出貨」，有糊要食。
方星俠