戒毒學校正生書院因建議遷址到梅窩，引發梅窩居民極力反對，但卻獲圈中人力撐，其中劉美娟、張崇德夫婦二人曾親臨書院為學生打氣，建議政府應撥款資助，更覺得偶像藝人也有責任，不要以身試法。
現於芝麻灣的戒毒學校正生書院，因為建議遷入梅窩，但卻遭到居民抗議，並有學生被居民直指是吸毒仔、吸毒妹，傷透學生的改過之心。早前劉美娟、張崇德夫婦為支持正生書院，親自到該校為學生打氣，並送上CD以作鼓勵。
唔跟明星俾人笑
劉美娟昨日在電話中說：「我去到見啲學生，佢哋好乖，仲好感動㖭，因為佢哋錯過又經歷過，家改過自新，人誰無過，佢哋唔想再錯先入嚟學校，將來佢哋要融入社會服務。」
對於梅窩居民的惡言相向，劉美娟指學生沒有感到憤怒，因為他們自知曾做過錯事，只是居民不了解，她覺得居民和校方也沒有錯，其實政府是有責任讓居民了解學校及學生，她說：「因為政府未好open咁講畀市民知，大家一聽見戒毒學校咪驚囉。」
劉美娟覺得偶像藝人也有責任，她說：「政府搵藝人去拍禁毒宣傳，點知到頭來個藝人去咗吸毒，我問過啲學生，佢哋話明星都係咁，如果唔跟會俾人笑。」在唔衰得心理下才有跟風吸毒。張崇德認為政府應撥款建戒毒學校，而不是由志願團體自發性去辦。
學校環境極惡劣
早前陳敏兒也聲援過正生書院學生，她在電話中說：「我只係以阿媽心態去勸交，之後嘅事交番畀議員同啲高官去處理，聲音已經出晒嚟，啲毒犯為咗錢唔會理，係好難鬥，咪惟有自己去預防，出事就去面對。正生書院連內地山區學校都不如，香港有咁嘅學校我好羞恥，作為香港人好醜，政府應該撥款出嚟建學校，如果政府冇錢，佢哋一出聲，相信演藝界可以籌款，香港年年搞咁多籌款活動，幫過唔少內地起學校，估唔到有間咁惡劣環境嘅學校。」
採訪：陳寶明
