新鴻基地產（016）噚日公佈，主管財務及投資者關係嘅兩朝元老黃奕鑑，將於明年1月退休，改任非執行董事。黃奕鑑喺新地做咗28年，佢今年只係57歲，講真未到退休年齡；新地發嘅聲明強調，黃奕鑑計劃退休好耐，希望留多啲時間陪伴家人，亦想多啲參與公益事務及義務工作。
退休後陪家人兼做義工
新地同時公佈，恒生銀行（011）前執董陳國威將於下月8日到新地返工，接替黃奕鑑嘅職務。咁都啱嘅，咁高層換人，用半年時間交接係正常；加上新地經過舊年大股東郭氏三兄弟內訌一役，畀人質疑企業管治有缺失，今番高層變動，當然要順利過渡先得。
新地非執董郭炳湘就認為，黃奕鑑係忠心員工，對於佢離職表示惋惜。據悉，黃奕鑑噚日喺董事會會議上亦表示唔捨得。
恒生前執董接任
值得留意嘅係，新地今次誠邀陳國威過檔，出手闊綽，除咗董事袍金成十萬銀，截至明年6月底止年度，陳國威薪酬係1431萬元，相對佢08年度喺恒生嘅年薪699萬元，直頭翻一番，當中包括一筆因佢辭職而損失嘅部份福利，可見新地幾咁求才若渴。黃奕鑑08年薪酬都係1341萬元喳！
陳國威今年53歲，會計師出身，95年加入恒生做助理總經理兼財務監理處處主任，98年起出任財務主管，負責財務規劃及管理。基本上佢係恒生第三把交椅，除咗財務，亦負責恒生喺內地嘅投資項目。據講佢行事低調，屬於實幹型。恒生噚日就公佈，委任中銀香港（2388）財務管理副總經理梁永樂出任副總經理兼財務主管，7月2日生效，算係接替陳國威嘅工作。
唔知係咪金融海嘯後，銀行業前景麻麻哋，陳國威已經係近期第二位由銀行轉到地產公司嘅資深賓架，之前係尹焰強由東亞銀行（023）過檔瑞安房地產（272）任財務總裁，都令市場非常震撼。
李華華
mailto:[email protected]