噚晚港交所（388）舉行上市九周年酒會，周文耀（PaulChow）最後一次以行政總裁身份出席，唔知係咪仲有半年先卸任，Paul全晚都冇乜離愁別緒，仲滿場飛同嘉賓影相留念，當然唔少得同華華等記者行家影相。
小加冇到公關支吾以對
唔少華華行家都有問PaulChow，同候任CEO李小加有冇交接問題，佢大派定心丸話，一切順利「過渡」，不過噚晚李小加冇出席酒會，華華冇得求證。
華華曾經問公關，點解李小加冇到賀，但公關支吾以對，冇解釋原因。
其實華華知李小加前晚已同百幾位華資經紀聯誼，但講social點都應該唔及呢個酒會方便喎，唔通真係一山不能藏二虎？
噚晚酒會仲有位稀客，就係為正生書院學生感觸落淚嘅前商務及經濟發展局局長馬時亨，佢俾記者追問點幫班學生，但佢無回應。