商務及經濟發展局副局長蘇錦樑show卡片事件，顯示政治任命官員政治觸覺遲鈍，阿Q精神咁諗，醜聞有個好處，就係可以做反面教材。
八方聽聞民建聯上月尾舉行路向營時，主席譚耀宗向出席者傳授從政心得時，就特別以阿蘇亂派卡片做例子，指阿蘇未做官前雖然做過區議員，但由於只係委任唔係直選，比較少做地區工作，所以唔知道卡片唔可以亂咁派，卒之引起軒然大波，譚耀宗勸勉黨內新進以此為鑑，要謙虛啲做好地區工作，搞出大頭佛機會會低啲。
譚耀宗講話聽聞引嚟唔少人會心微笑，而能言善辯嘅曾鈺成訓話時就自嘲，新丁講嘢要學阿譚咁四平八穩，唔好似佢惹火頭。