特區「人肉錄音機」林公公紅到台灣，處男登台就響晒朵，財爺鬍鬚曾可能都好羨慕林公公得到台灣傳媒厚待，誓要做另一部熱爆政界嘅錄音機，所以噚日喺立法會財經事務委員會上提到金管局任總接班人問題時，只重申一個口徑，就係一切依法辦事，詳情稍後公佈。
涂謹申：你係偏幫
會後唔少議員都話呢60分鐘會議真正嘥心機兼嘥時間，有睇爛戲想掟嘢凳叫回水衝動，公民黨湯大狀噚日朝早本來去打高爾夫，為了開會而延期，對鬍鬚曾咁表現十分失望，質疑有欺騙議員之嫌。財爺唔講嘢被議員狂轟，會議主席民建聯陳鑑林護鬚心切，多次為財爺解圍，甚至叫苦苦追問財爺不果嘅卿姐「算喇」，言下之意係大家唔好再問，點知反被議員質疑佢是否代表財爺。
會上炮火連天，陳鑑林一度叫議員唔好謾罵同埋陰謀論，搞到議員扯晒火，涂謹申自行對號入座，強調無陰謀論；陳鑑林堅稱大家自己評論囉，擺出戰鬥格，火爆涂謹申當然唔示弱，大鬧「我話你係擦鞋仔、我話你係偏幫！」現場氣溫即時升咗幾度。陳鑑林口硬，堅稱「好對唔住，我唔接受。」近日議員幫戲院里擦鞋仔爭取發牌，應該幫陳鑑林攞埋。