昨日內地股市在內房股帶領向上，可惜其強勢未能惠及港股，恒指連跌3日，一度低見17833，下半場大市雖見回升，仍要下跌80點，但總算守在18000以上收市，惟市況波動，散戶即市炒作不易獲利。
近期缺少炒作話題，港股高位反覆。今年澳門選特首，睇落似乎唔使點選，大概都知邊個會成為新一任「馬交特首」。市場憧憬中央到時又會「送人」畀澳門以刺激賭業及旅遊，澳門賭業及相關股份昨日急升，其中以賭王家族之新濠（200）及信德（242）升幅較搶眼。
新濠吼位短炒
新濠旗下「新濠天地」已開幕，係繼金沙威尼斯人後，第二個進駐路氹的大型賭場，集團管理層當然對賭業前景充滿信心，認為博彩收入可在年底回升。有關預期似乎與澳門特首換人後，中央將放寬內地民眾赴澳旅遊之憧憬脗合，短炒賭業股或者有得諗。
新濠昨以大成交重越50日線，14RSI亦由低位回升，短炒目標5.30元，穿4.20元止蝕。
方星俠