金融海嘯下籌款做善事，要諗多啲花臣，花旗香港內部一班管理層，早前捐出私人珍藏，由內部同事網上競投，賣到嘅善款捐畀東華三院復康中心幫啲失明嘅長者。最令華華好奇嘅係，啲高層平時收埋啲乜嘢珍藏呢？
公關話，收到嘅珍藏由限量版京奧郵票、古董鑽石襟針及限量版一級方程式跑車模型，到清朝嘉慶年間嘅古董枱凳都有。有高層將自家製品拎出嚟賣，好似香港區法務部總監陳美珊親自畫幅油畫，另一名女高層就自製朱古力蛋糕，個蛋糕賣咗成千銀，不過都唔及一支ChateauLafite1989紅酒（圖）吸引，被人以7倍價錢投得，賣咗成萬蚊。
公關話個活動好成功，籌咗5萬7銀比預期中好。