摩根大通中國區主席李小加（Charles），10月先正式過檔港交所（388），明年1月中接替周文耀做CEO，雖然4個月之後先返新工，但已伸出友誼之手，噚晚喺金鐘力寶軒酒樓，同120位華資經紀摸杯底談談情，由晚上7點食到10點先散場。
熱身飯局嘅牽頭人係CEO遴選委員會成員之一嘅港交所董事李君豪，身為證券商協會主席嘅佢，喺李小加任命時已預告會設宴，噚晚請到中潤證券蔡陳葆心、金利豐朱李月華、恒豐張華峰、大福黃紹開等人到賀。
同華資經紀摸杯底談心
事實上，華資經紀本身同李小加唔熟，曾經擔心佢會偏幫外資大行，但今次飯局即時破冰，皆因海上油田工人出身嘅李小加，噚晚又一次發揮幽默本色，雖然周文耀無出席，但Charles話港交所呢對鞋因為周文耀變得好大，唔容易着，佢要花時間好好學習。
有出席飯局嘅張華峰讚李小加和藹可親，因佢表明唔知本港所謂ABC組經紀點解，只知道香港金融市場嘅成功，係有賴各個大中小經紀同市場人士嘅共同努力，自己上任後就會繼續帶領港交所國際化。
李華華
mailto:[email protected]