發展事務委員會今日討論第三期四川重建撥款，政府爭取7月3日財委會通過撥出30億元，雖則話血濃於水，援助四川災民應該無人托手踭，但民主黨表明暫時唔會支持再撥款，高達噚日好勞氣咁話，立法會已批出兩筆款項，但至今關於當地重建嘅專業報告影都冇，香港人嘅錢有冇俾人中飽私囊，議員一無所知，試問佢哋點可以再批錢？
高達做咗夾心人
負責呢單嘢嘅發展局局長林鄭月娥對撥款可能受阻好緊張，八方聽聞佢落重藥游說高達，希望民主黨回心轉意。好彩民主黨從來唔係鐵板一塊，只要當局承諾拿出一個報告，交代重建進度、開支明細，該黨有得傾，至於是否必須先到四川視察，反而唔係關鍵。
高達噚日七情上面，實情佢係夾心人，所以咁痛苦，事緣早前發展局申請開設發展機遇辦事處主管職位，有人向林鄭表示無問題，點知黨內其他議員反對，民主黨最終投反對票，民主黨消息指可能有人自覺欠林鄭一個人情，因此今次盡力斡旋，希望有個交代。