以前左丁山係記協會員，新聞行政人員協會會員以及報業公會理事，後來離開報紙，只做寫稿佬，於是中止晒會籍，但久唔久仍然有報界朋友請去參加三會聚會，三會之中，可能以JA（記者協會）嘅活動最多，亦係最窮嘅一個會，一年一度靠「打心口」搵人捐錢嚟籌措活動注資。老實講，做JA主席好花時間，搞活動，搞籌款，支援記者等等，次次傷腦筋，你估好好玩咩，如果冇服務同行、堅决維護及爭取新聞採訪自由嘅使命精神，記者邊度肯去做記協主席吖。以前左丁山有權話事之時，鼓勵記者參加記協，由報館代每一位會員交記協會費。不過左丁山係敗軍之將，不足言勇，其他事不談也罷。
大記者話今個星期六（六月二十日）係記協改選之期，六年前嘅主席麥燕庭重出江湖，競選做主席，佢嘅參選團隊有副主席岑亞志，執行委員陳羲文、陳健佳、孔雪怡、梁頌恩、曾錦雯、謝志峰、黃雅斌、梁錦雄、郭家傑、戴偉倫等，大記者話Mak姐（麥燕庭）嘅內閣有新人如陳羲文，有資深記者如謝志峰（二十年前六四之夜在天安門廣場公廁為亞視現場報導到最後一分鐘嗰位，現城市論壇主持），又有前輩岑亞志（前《虎報》），可說新人舊人兼備，有朝氣亦有經驗。大記者話請各位記協會員盡量在六月二十日早上十一時之前將選票填好，送到記協會所。
原來記協選舉方法與港大學生會差唔多，就係主席、副主席，委員各自競選。蔡子強話港大學生會選舉出一位陳一諤同學為主席，選出所有反對陳一諤嘅同學做委員，你話學生會開會時幾好玩，點樣做事呀？想像吓，曾先生做特首，李柱銘做政務司司長，湯家驊做律政司，田北辰做財政司司長，一齊開行政會議，會係乜嘢場面？Mak姐大概有見及此，特登組織一個團隊參加競選，希望全部入選，之後做事會順暢好多。左丁山冇投票權，幾年前見過麥燕庭前主席，留下印象，覺得佢做事幾有魄力。參選副主席嘅岑亞志係記者中之叔父輩，英文好到極，由佢輔助麥燕庭，應付國際傳媒，係上佳人選。