知錯能改善莫大焉，學壞咗誤入歧途嘅小朋友，難得肯聽話改過，返學校讀書，足以證明佢哋本質根本唔差，過來人都知升中一嘅年紀係最反叛嘅，一個唔覺意少啲家人關心就好易學壞。有統計指出，正生書院學生改過成功率達到9成，絕對係一個非常值得鼓舞嘅數字，因為呢所學校肩負起拯救下一代重任，9成贏面分分鐘大過你千挑萬選嗰10隻股票。梅窩居民咁都反對，係咪9成都唔放心要十成成功才可以安心？
難得有唔少有份抗爭嘅居民有口話人無口話自己，大大聲響自己仔女面前句句侮辱啲改過嘅學生吸毒仔、吸毒妹，呢類人其身不正，佢哋點做係仔女嘅榜樣，正如有好多小朋友眼見父母對菲傭呼呼喝喝，就鬧個賓妹係死蠢，今次居民搞到人哋喊晒，正一係攞嚟衰，被視為烏合之眾。
鄉紳背後利益幾何
呢班居民遠遠不如帶住幾十名學生好守紀律咁面對居民批鬥攞晒同情分嘅正生，咁啱有個做晒A1頭條嘅16歲小妹妹又叫做「阿菁」，相信雖然班學生明知俾人擺咗上枱，只要結果係對自己一方有利，已經係好值得。正如10多年前九龍灣麗晶花園旁邊興建社區健康中心，同樣遇上居民抗爭般，政府同樣未有事先廣泛諮詢居民，今次再犯，就真係抵俾人抦。政府從來不懂協調民心，難得特首與唐唐都肯即時出嚟係咁意關心一下，其他高調搞禁毒同搞教育嘅部門一於可以出少句聲費事越幫越忙。
香港人口口聲聲為下一代憂心忡忡，唔少卻沒有做好榜樣，經濟利益凌駕社會利益，幾多具歷史價值嘅建築話拆就拆，政府養住一班高薪低能公務員，無論景賢里到中環舊警察宿舍，每次成功擺平事件，都係靠擺納稅人上枱，證明任何事件當遇上雙方僵持不下，基於羊毛出自羊身上，總會有人要付出代價，不過每次都係出嚟補鑊嗰一款。
好多滿口仁義道德嘅仁兄，係唔係大家表面睇到咁，心知肚明。一個一向跟政府少有溝通嘅大嶼山梅窩小區，班鄉紳自己有幾多來自捍衞一間校舍維持空置或者壟斷發展權嘅好處，與地產商關係如何，足以構成千絲萬縷利益關係，究竟佢哋背後代表緊幾多人同埋邊啲人嘅利益，自有傳媒踢爆。假如要當地居民逐個投票數人頭，結果卻未必會一樣，今次又睇吓政府點樣利用納稅人嘅錢擺平事件。
胡孟青