聯合醫院有醫護人員染豬流感，在公立醫院工作嘅醫學界議員梁家騮噚日又中招，笑言暫時唔知係咪豬流感，騮哥噚日戴上口罩出席立法會會議，有人問佢睇醫生未，佢話：「有，照鏡囉！」仲識搞笑，相信病情應該冇乜大礙。
勞工界潘佩璆醫生在聯合醫院工作，八方問佢有冇加強防疫，佢話噚日全日身在立法會冇返醫院，唔知同事病況，又指醫院已實施最高級別防範措施，只要做足消毒程序，一般情況下醫護人員感染風險不會太高。
沙士時醫護人員首當其衝，醫管局近日向每位員工派發一包口罩，寫明係供員工個人使用，醫管局話係對員工表示關心一點心意。