全城急救正生書院，公民黨黨魁余大狀帶頭，自薦做Mentor輔導學生重返正途，英文可能好過中文嘅毛姨姨，表示可以將英語教室搬入正生，入去開班教英文；有個大廚男友嘅陳淑莊，則有意拉埋另一半「英雄哥」落水，暑假期間會拍拖入正生教學生煮飯。
「英雄哥」係食肆老闆，煮得一手好餸，不過去到正生可能無用武之地，因為正生學生並非泛泛之輩，民主黨張文光同八方講，以前去正生書院探訪時，曾光顧正生在長洲開嘅餐廳，呢間餐廳雖然由學生打理，不過出品絕不兒嬉，張文光嘆咗個雞翼同pizza，好有驚喜，好食到差啲連雞翼骨都埋落肚。
張文光指呢間餐廳喺長洲都薄有名氣，好多遊客慕名而至，佢話唔幫襯就走寶，街坊亦向佢大讚呢間餐廳搞得好，班學生亦好盡責，直情當佢哋係寶。社民連都好關心正生，毓民下星期二親往探訪，屆時會帶埋T恤同招牌香蕉送畀學生。