千億爭產案全城關注，市民當電視連續劇咁追看案情，立法會議員亦八到出汁，對於風水師原來咁好搵，掘幾個窿種生基做法事，就可以收取十幾廿億元十分詫異，法庭上講過嘅嘢大家都知，唔知嘅係究竟稅局有冇算過哨牙通應該交幾多稅呢？
代表商界嘅林健鋒噚日在立法會上向當局提出口頭質詢，指近日有報道提到有位風水師兼按摩師，提供服務後收取巨額酬勞，甚至有人繪影繪聲話啲錢多到要一車車銀紙運走，咁大宗交易，唔知稅局會唔會去了解吓？
促查風水師數簿
另一個議員黃宜弘含沙射影，話家社會上好多人後悔入錯行，原來風水師輕易風生水起，閒閒哋有幾十億身家，如果呢類「自僱人士」冇數簿，稅局點查清楚他們收入徵稅呢？風水師多數係高人，稅局要查清楚佢哋盤數真係唔容易，可能要搵神算子幫手先得，一旦羅庚同算盤大鬥法，真係慢慢先同你算賬。
民主黨李永達最直接，指近日法庭經常提到一位姓陳風水師有巨款收入，稅局應該邀請佢提供資料，做個盡責公民進貢庫房，佢又擔心如果有人辯稱筆錢唔係報酬只係「大」利是，又使唔使交稅？呢個問題確實有需要澄清，涂謹申話好多風水師無價目表，唔會明碼實價收費，做完嘢由顧客隨心饋贈利是，明明係收入卻唔上報，恐怕變成逃稅大漏洞，有損公眾利益喎！
議員諸多問題，萬變不離其宗都係想八卦哨牙通究竟交幾多稅；署理財經事務及庫務局局長梁鳳儀回覆時表明唔會評論個別個案，強調稅局有team負責打擊逃稅嘅資料搜集組，佢哋好似警方情報科一樣，會從各種途徑收集涉嫌逃稅嘅消息，當然包括傳媒報道、法庭案件同大家都關心嘅熱門話題，通通唔會睇漏眼，之後會交由審核及調查科跟進，會好似警方CID咁追查。
高官咁講法，似乎係暗示唔會放過哨牙通，梁鳳儀又指雖然饋贈唔使課稅，不過要提出證明，做完法事收利是可視作報酬，應該要交稅，除非客人額外打賞就另計。
mailto:[email protected]