每次去台灣，入到酒店房，首先留意的一定是廁所，皆因台灣酒店特別鍾意玻璃浴室，而出差時都是同行家孖房，兩個男人玉帛相見都幾尷尬。有次與家人同遊台北，入住酒店的廁所居然是全玻璃無遮無掩無得落簾。剛去過台中的民宿，boutiquehotel式的設計，廁所連牆都無，馬桶就在床的對面，就算係畀情侶住，都唔使咁親密吧？歐洲的公廁都令人大開眼界，阿姆斯特丹的街頭就有一個X字的男士專用尿兜，試幻想你企喺旺角銀行中心前如廁的感覺！而真的有路人唔介意在大庭廣眾面前放水，引來一班另類遊客狂影！最近在瑞士Lausanne開了一個玻璃公廁，膽大者可入去屙一屙，雖然關門後會自動感應泛起一層薄霧，但總有唔自在的感覺，屙都屙得唔暢快！
記者：吳允冲
網址：http://www.youtube.com/watch?v=g3Y6DGPq5Xc&feature=player_embedded