一件復刻版波衫，再加三口螺絲（羅斯）釘，就釘死美國。講嘅係意大利前日憑喺美國出世嘅基奧斯比羅斯省入兩粒，加埋迪羅斯入一球，喺洲際國家盃反勝美國3:1，似乎件新波衫幾老利；而呢場可以話係羅斯仔喺國際舞台嘅響朵之作，但此羅斯不同彼羅斯，話佢好似82年世界盃金靴獎得主羅斯升至「金童」級，就未有耐咯。
復刻波衫紀念望再贏世盃
唔講三口螺絲，先講件衫。呢件復刻波衫，係紀念意大利贏1934同1938年世界盃，以當年設計為藍本。話晒意大利咁多年只係試過成功蟬聯世界盃一次，贊助商希望意軍贏06年世盃後，好運可以延續落去。件衫偏向淺藍、V領、隊徽放大咗，而胸口到肚腩位置就有暗斜紋，正唔正就各花入各眼，但意軍喺大賽從來都慢熱，今次以一件「傳統衫」反傳統，妙哉！
講返場波，話就話三口釘發威，但如果唔係球證亂嚟，上半場33分鐘驅逐美國中場列卡度奇勒離場，戰局完全會係兩回事。講真，列卡度奇勒係踢中加度素，但直接畀紅牌實過嚴。意大利踢多個但因基亞連尼輸12碼，被當路雲射入先落後，好彩後備入替嘅羅斯同埋10號仔迪羅斯先後遠射得手。
羅斯仔入兩粒被捧上天
去到完場階段，喜見派路仲有火，喺左路嚟個施丹式轉身扭過人之後，落到底線幾乎第4時間睇到定斬中，羅斯仔就第一時間抽入球靚波，為意軍鎖定勝局。賽後各傳媒又勁煲羅斯仔，有指曼聯想佢食回頭草，又有指祖雲達斯想簽佢，不過當年馬卡朗尼喺國際賽處子戰上位、而柏仙尼成為新溫布萊首個連中三元球員，咁又點？咪一樣半紅不黑？麻木晒囉。羅斯會唔會去到嗰個羅斯嘅級數，而意軍贏一場係咪代表今屆賽事一帆風順，都係睇定至講啦。