勤+緣（2366）行政總裁梁鳳儀話幫四叔李兆基寫自傳講Part2咗好耐，咁點解拖到家都未面世呢？梁博士噚日出席公司業績記者會之後話，原來佢舊年10月已經寫到最後一個chapter，點知四叔話金融海嘯，大家唔會有心情睇，所以就hold住咗，不過近排四叔又叫佢開工，仲計劃喺7至8月左右執執啲稿。睇嚟本書面世有望，不過一定唔會係下個月書展囉。
梁鳳儀：收到柯打開始執稿
不過，其實本書幾時出真係未有時間表。至於本書內容講乜，博士話會講到四叔生活同埋前瞻，又會講吓啲仔女同埋啲孫。咁四叔有冇開聲話明想要粒內孫仔呢？博士話，四叔對男女內外孫都咁喜歡，啲仔女越生得多就越好，而佢仲好錫啲孫，周不時買玩具畀佢哋。