鞋王鄧劍群舊年發現三奶Karen（李姿霆）搭上港男黃長發，激到生蝦咁跳，佢早前入稟追番Karen嘅物業，但Karen同黃長發呢段姊弟戀半年就玩完，俾長發拋棄嘅Karen仲被傳啪藥自殺，但挽救唔到呢段情。
兩頭唔到岸嘅Karen日前崩潰痛哭，揶揄黃長發係一個可以共富貴，但唔可以共患難嘅人，已經39歲嘅Karen先話學識成長。
黃長發狠撇Karen後同樣熄手機玩潛水，阿哥黃長興力撐細佬，對於Karen嘅指摘，長興噚日喺電話寸爆咁話：「佢（指Karen）好無聊，佢都冇乜嘢錢啦，感情係唔可以勉強，開心就唔出聲，唔開心就數人，佢都大個女啦，咪咁幼稚。」黃長興指黃長發雖然喺香港，但暫時唔會蒲頭澄清Karen嘅控訴，長興話：「呢位小姐咁鍾意曝光，咪畀佢玩吓先。」
鞋王：好多人慘過佢
對於Karen喊苦喊忽，鞋王一啲都唔同情佢，噚日佢喺電話度話：「通街好多人仲慘過佢，佢嘅嘢唔關我事，我唔識呢個人。」Karen搞到咁，鞋王會唔會放佢一馬，停止入稟？佢話：「佢係我嘅被告，我係原告，至於告唔告佢，我家嘅位置係觀眾，睇吓件事發展成點。」