呢個世界充斥擦鞋仔，不過要攞正牌擦鞋卻唔係易事。喺金鐘同中環戲院里搵食嘅幾個擦鞋匠，向議員申訴多年來不斷受政府部門壓迫，想自食其力搵兩餐都冇運行，公民黨余大狀號召中環上班族明天中午集體去擦鞋，用「腳」撐擦鞋匠，民主黨甘乃威等唔切，噚日已經去幫襯，而且透露食衞局副局長梁卓偉同意考慮發牌畀呢幾個擦鞋匠，先決條件係中西區區議會支持。
甘威搶閘邀功
為擦鞋匠成功爭取牌照，甘威急不及待報喜，八方聽聞公民黨對有人搶閘邀功不以為然，甘威否認截糊，表示10年前已處理過擦鞋匠牌照問題，可惜當年政府拒絕彈性處理，佢亦無可奈何，近年政府積極創造就業機會，呢個老問題先至有轉機解決。佢又話近期再發出「雪糕仔」牌照競爭激烈，反映人浮於事，小市民想做小販餬口，當局應該認真諗諗呢個問題。
食衞局今次畀隻好牌民主黨上，小道消息話因為民主黨向來好支持該局種種政策，所以禮尚往來，親疏有別其他人唔「恨」得咁多。