馬場廂房內，見到好多商界名人，多不是熱心投注人物，大家話題多多，未必與馬有關。講到風水案，風水陣可保命，續命？玄啲噃，不如講運動好過。大馬主W講，佢已經退休，注重健康，得太太批准，一個星期可以行山三至四次，有益身心，退休一年後，減肥二十幾磅，腰圍瘦咗兩吋。望真吓佢，果然面目清瘦，雙眼烱烱有神，一副健康男人模樣，但行山咪兩公婆一齊去囉，何須老婆批准呀？馬主W話：「小行一兩小時，太太就會一齊去，但我上山往往五六小時，老婆掛心我一個人在外，所以要佢批准。」行山行得耐，馬主Ｗ有心得，孭住一個背囊上山，內有兩件內衣，一件Ｔ恤，一件防水風褸，一瓶寶礦力，一小包鹽，一包四件日本「羊糕」（可以保存較長時間，含糖份），兩瓶清水，一塊大棉手巾（抹汗用），當然仲有手機等，加加埋埋，甚為重磅，孭住行六小時，咪話唔辛苦。馬主Ｗ話上山考驗心肺，下山勞動手腳關節，下山時要特別小心，不可過急，慢啲無妨。
大馬主Ｎ聽完，對左丁山講：「我哋真係唔夠健康咯，除咗返工，就係到馬場或晚上應酬。」諗諗吓又係，於是食自助餐時立即減量，對住啲美食一於忍忍忍，三時半後嘅下午茶當作睇唔見。既然少運動，食少啲都算喇，希望防止繼續肥落去，不過想減肥就難咯，冇馬主Ｗ咁勤力行山就想減磅？呢個世界冇免費午餐嘅。馬主Ｗ話行山有如青年人索Ｋ，會上癮，一個星期唔行番起碼兩次，就覺得周身唔安樂，好有衝動要上山。呢排上山鍛煉心肺，增強抗疫能力，避免染上豬流感，可說一舉兩得。
豬流感（甲型H1N1流感）已經擴散，隨時有機會中招，唯有自己盡量小心而已。前高官Ｌ先生退出官場後，曾任兩個主要半官方機構總裁之職，全退後到處旅遊，剛自北美回港，Ｌ太太話在多倫多與三藩市，佢哋勤洗手，戴口罩，畀當地朋友視為異類兼緊張過度。Ｌ太話北美人士對豬流感視若等閒，政府無特別防範措施，同我哋香港之緊張態度完全唔一樣，佢兩夫婦好驚感染到，幸好無事，回港後，Ｌ先生夫婦自動留在家中足足兩個禮拜，先至出街見人，不愧係負責任之香港人！