噚日生力啤（236）開股東周年大會，股東席上逾九成係年過半百嘅叔叔嬸嬸，一早坐定聽董事會副主席郭嘉寧滙報。今年同以往唔同，冇咗大食會，唔知係咪因為咁，定係因為呢排股東維權意識高漲，股東會期間有兩位小股東先後打斷主人家發言。
股東：冇息派不如私有化
其中一位pinkauntie率先發炮，話生力連續3年都無派息，幾時先捨得派息？仲叫董事局「不如將生力私有化啦」，生力位公關話答埋書面問題至再答佢，點知呢位auntie唔罷休，話生力元朗啤酒廠搬上大陸一年又搬返嚟，公司個plan係咪得一年？郭生惟有回應，話公司暫時冇私有化嘅打算，亦冇考慮撤出大陸市場。點知一波未平一波又起，另一着黑衫嘅auntie股東又企起身發炮，仲拉埋特首曾蔭權落水，話特首都帶頭減薪，咁董事會有冇考慮減薪？佢仲話在座冇幾多人識聽英文，叫班董事局成員用廣東話答問題。郭嘉寧只係回應佢一句，「董事局成員已經放棄咗08年袍金」。
副主席：董事舊年冇收袍金
生力業績連續4年見紅，小股東有怨氣在所難免，生力執董譚嘉源話，元朗酒廠喺4月重新投產，首批出口產品喺5月中已付運，整體情況令人滿意，希望年產量可以重返約一億公升水平。
李華華
mailto:[email protected]