雖然已經篤定做澳門特首，但唯一一位候選人、前社會文化司長崔世安點都要做吓樣扮積極參選，所以佢噚日好高姿態咁拎住286個、即係超過95%選委提名去交參選表格。選委唔可以重複提名，剩低可以提名嘅選委只有14人，連50個選委提名先可以參選嘅門檻都唔過，試問仲有邊個可以報名？
崔世安呢鋪玩得咁大，當選機會都有99.99%。總之7月26日投票日當天，過半數選委投票支持佢當選，咁就不費吹灰之力成為鏵哥接班人。未選先贏嘅崔世安噚日強調會以「傳承創新」精神帶領澳門抵抗金融海嘯，但澳門選委高天賜對只有崔世安一人參選就非常失望，覺得澳門繼續畀權貴人玩晒。