銀行存款利息咁低，所以每次同朋友傾偈，敏妮一定會問吓佢哋有乜投資路數。前幾日同個數口好精嘅朋友食晏，敏妮又問佢近排有乜嘢好投資。佢話前嗰排有做股票掛鈎票據（ELN），雖然家陣收息冇金融海嘯前咁高，但息率仍然吸引，但近排銀行推銷嘅ELN唔係好多，所以最近已冇投資ELN。
銀行自己推ELN產品
ELN點樣玩，理財版都講過唔少，不過佢講到家陣市場上面冇乜ELN，敏妮都好認同。先唔講由於雷曼迷債事件，令到銀行職員勁sell投資產品嘅場面冇以前咁盛，即使睇報紙都好似少咗呢類投資產品嘅廣告。至於收息冇以前咁吸引，敏妮起初以為係同股市未升到好似前年咁瘋狂有關。不過同光頭仔傾開，佢啲金融界朋友話佢知，市場少咗ELN產品，同啲產品回報率唔及以前，可能都係同莊家唔同咗有關。
以前出ELN嘅主力都係投資銀行，普羅市民喺銀行見到嘅ELN，都係銀行代理產品。由於雷曼迷債事件，令大家醒覺到，原來交易對手有事，會搞到銀行一身蟻。與其幫人做不如自己搞，據光頭仔講，家陣銀行自己出ELN，但考慮到風險因素，而且銀行做生意進取得嚟都相當審慎，所以ELN息率會冇投資銀行定出嚟嘅咁有競爭力。
息率不及以前
當然光頭仔講嘅敏妮未證實，但若真係如佢所言，敏妮就可以解釋到，原來近排市場少咗ELN產品，而推出嘅ELN息率又點解冇以前咁吸引，原來唔係因為投資者唔敢買。其實投資者都係善忘，只要有錢賺，之前嘅傷痛可以好快好番。不過，敏妮都同位投行做開衍生產品嘅朋友傾過，佢話家陣後市有人睇好，有人睇淡，真係投資呢類要接貨嘅金融產品，都係小心啲好！
溫敏妮
http://wanmanli.com/blogs/