大熱天時第一盤凍水淋落頭，有消暑感覺；但第二盤凍水再淋落頭，可能就會冷親而大傷風。港股連跌兩日，散戶家陣就有上述類似感覺。大市昨一度低見17859，收市報18165。波動市令股友迷惑，究竟大市升浪已完，抑或只係大牛市起動前一次大調整？
股海出現調整，好多散戶都話想吼低買貨，其中內銀股抗跌力明顯較強，建行（939）及中行（3988）逆市中均見追捧，皆升逾1%，分別收報5.71元及3.73元，而建行今日除息。
伺機買入中線持有
近日同幾位窩輪界老友飯局，彼等異口同聲話內銀股可以望多兩眼，唔通真係有料到？其實，內地銀行今年1月至5月新增貸款表現不俗，在寬鬆貨幣基礎下，大型內銀股資金成本唔高，加上內地經濟步向復蘇之路，有利內銀股。
建行一向甚得投資者歡心，最近唔少大行都有發表報告「撐」建行，而且各大行所訂目標價起碼都有6.20元以上，反映一眾外資大行相當睇好建行。建議伺機買入作中線投資，獲利目標6.80元。
方星俠