孝敬母親，有萬試萬靈的養顏燕窩，至於父親大人實在教人費煞思量。朗豪酒店Tokoro的日籍總廚平山隆典，特別於六月帶來日本水魚，炮製有壯陽功效的大餐以饕父親。師傅指日本水魚肉質軟腍，膠質豐富，今次首度引入在京都、大阪非常流行的水魚雜菜鍋，將水魚用清酒及水煮6小時，使水魚熟透，肉質變腍，滲出酒香。另外更新創冷製水魚啫喱，啫喱清中帶鹹香，水魚肉沉澱於杯底有鮮味，師傅說日本人愛吃水魚壯陽，更會生劏水魚頭，將鮮血溝清酒飲，因食法太激，今次未有引入。未必個個父親也愛咁激，明閣有較溫和的選擇，總廚曾敬超師傅找來強身補腎的海參入饌，妃子笑凉拌海參絲用上當造荔枝妃子笑，伴煨腍的婆參，冷凍後切成絲，再加入青瓜、紅蘿蔔絲等，入口清甜。
記者：黃家欣
攝影：梁細權
冷製水魚啫喱$67
啫喱先是清甜，然後是一朕鹹香，沉於底部的水魚肉是精華所在，口感似鹹瘦肉。
水魚雜菜鍋$117
以清酒煮成的水魚湯鮮甜味美，水魚皮煲得爽脆彈牙，更有滋補作用。
金盞遼參肉崧$168
以春卷皮炸成的金盞香脆不膩，以遼參切粒伴肉崧、冬菇粒、鮑魚粒等同炒，乾爽惹味。
妃子笑凉拌海參絲$98
當造的妃子笑荔枝清甜多汁，海參絲爽中帶滑，有點像海蜇，口味清新。
Tokoro（35523330）
旺角上海街555號朗豪酒店3樓
明閣（35523300）
旺角上海街555號朗豪酒店6樓
請老竇食餐好
消夜睇波贈興
母親愛飲早茶，父親當然最愛消夜睇波。父親節當晚，彩雲軒推出消夜自助餐，由晚上9時至12時，食物包括即席生滾粥，可自行選料，包括帶子、石斑、花膠等，還有十多款中西甜品。餐廳更特設三個超大型螢幕播放球賽，實行與爸爸盡興而歸。
收費︰成人$98、小童$78
彩雲軒（26226154）九龍太子道西193號帝京酒店大堂
時間︰9pm-12mn
食法國餐率先試跑車
父親節，帶爸爸到全港最高級法國餐廳之一Caprice！大廚Vincent特別準備四道菜父親節午餐，包括法式龍蝦沙律、香煎鴨肝伴茴香士多啤梨等精緻菜式。預訂父親節午餐，更可免費安排爸爸率先試車，仲係試Jaguar系列的最新型號XF及XJ跑房車！
收費︰每位$680
Caprice（31968888）中環金融街8號四季酒店6樓
時間︰12nn-3pm
紅白餐酒贈爸爸
如果爸爸好餐酒，就要帶他到擁有自家酒窖的Cucina。父親節當晚享用精選晚餐，即豁免加一，另外每位父親可免費品嚐三款精選餐酒。五人或以上惠顧，並至少於三天前預訂，其中一位父親即免費，更可免費攜走CucinaAngoris紅或白餐酒1支。
收費︰每位$650
Cucina（21130808）尖沙嘴廣東道3號馬哥孛羅香港酒店6樓
時間︰6pm-10:30pm
