新人結婚租車，99.9%將Budget擺晒喺婚禮頭車度，接載兄弟姊妹用嘅腳車大多是是但但，我更遇過Hiace黐幾隻花球當腳車用！查實租架坐得舒服、載得嘢多嘅Alphard，只不過日租千六蚊，但實戰起嚟妙用無窮，對佢哋好啲，夜晚幫你頂酒都落力啲啦！
記者：徐影龍
攝影：王文忠
兄弟當床瞓
做過兄弟，仲要揸埋腳車，你一定知當中苦與樂。晨早六點起身唔在講，大熱天時全套老西上陣，被姊妹舞完一輪再趕場註冊同行禮，未到酒樓成班人早已筋疲力盡。租番架似樣啲嘅腳車所費無幾，但班兄弟就舒服得多。好似今日呢架Alphard咁，一星期七日均一價，日租只係$1,600，級數同賣相算係七人車中頂班，唔失禮之餘，內櫳帶點誇張嘅闊落，中排兩張獨立椅可算係全車靈魂，近乎180度平卧式角度調校，兄弟們忙裏偷閒眠一眠，戰鬥力真係爭好遠。座椅軟綿綿舒服唔在講，現實中兩條大漢頂到晏晝，睡魔已經急Call，上車唔使5分鐘即扯鼻鼾。後排都唔弱，平時坐三個大漢都好鬆動，一條友當梳化床咁瞓都無問題，唔使耐，「叉」番半粒鐘已經頂到夜晚散席唱埋卡拉OK。
雖然大昌行租車部只有04或06款Alphard，無得玩350般嘅6前速+/-波，不過3,000ccV6已經好夠行，攝影隊跟車追拍婚禮頭車BenzE仔，全程咬住無甩過，滿人滿貨上城門隧道，依然有心有力爆住去，車身夠高易睇位，就算屬SundayDriver嘅兄弟都舞得掂，毋須花錢請司機。
姊妹一個墟
女仔講儀態，打死都唔會喺車度瞓，雖然齋坐Alphard都好舒服，但佢哋似乎更Enjoy趁機圍埋八卦寒暄一番。接新娘過男家時，全車只得四個姊妹，但雞啄唔斷，總之分貝超晒標，呢種Relax氣氛當然拜Alphard夠舒服所賜，但最得姊妹歡心嘅，係車內有大量置物位，手袋、電話、化妝箱任擺唔嬲。由於車身近2米高，就算尾排未摺起，尾廂空間依然足夠，大大幅油畫、鴛鴦枕、巨型結婚Bear等等，姊妹們塞得就塞，所以男人買車想另一半放行，尾廂空間必定不可忽視。女人最需要別人體貼，Alphard中排兩張獨立座椅，形成中間一條小通道，令後排乘客上落毋須摺椅兼推凳，保持儀態萬千，仲有就係雙電趟門設計，一隻手指輕力一拉，即時自動開合，使乜扎晒馬咁去拉道門咁失禮，再唔係司機位一樣有電門按掣，有風度之人自動自覺幫女士開門，包保靚靚伴娘對你加分。
查詢：大昌行租車部（27682277）
