我不是跟老總抬槓，睇過全版〈香港再出發宣言〉廣告後，我真心相信，香港要restart，除了相信梁振英他們高調牽頭的宣言之外，唯一能一start再start的，是搵風水師治港。風水治港，從香港與中共政權角度睇，乃係必須的知己知彼。風水地運，冇花冇假，假如香港已經冇運行，投靠上海抑或深圳好，在在需要風水指點迷津。雙規當道，一旦靠錯站，想U-turn和reset就費周章了。而認識一國兩制，不忘睇風水時辰，有人說，世界上沒有共產黨長命過72年，這樣說，到底中共能大破宿命抑或……你不敢說，梁振英冇comment，唯有風水師能一言記之，聽佢點，雖然只是五五波，這枝命水盲公竹，還是不能省。而社會和諧，不能一言堂說了算，必須風水調理，固本培元。河蟹和草泥馬這兩種怪胎，有了風水滋養，就像戒毒新生一樣，可以重回正途。
宣言推銷熱愛香港，願意付出。問題係，你請客，我付出，埋單計數，永遠是無權無勢的小市民蝕入肉。風水治港，有板有眼，所謂種瓜得瓜種豆得豆，公義反而彰顯。
香港再出發，將香港打造成風水之都。科技港、中藥港都是得個講，風水港倒是渾然天成。一個風水佬勝過十個機遇委員會。香港再出發，一路好走，依仗風水師，點條明路行。梁振英唔係叫做TonyLeung，就算係梁朝偉都要借歪，俾風水師坐正，帶挈香港，振臂高呼：兄弟，上！