大市連續兩日大調整，噚日跌勢一度頗急，18000點大關失守，尾市略為轉穩，恒指收報18165，跌333點，期指跌383點，低水擴大到128點。
恒指由3月的低位反彈，20日線只係跌穿過一次（4月28日），噚日係第2次跌穿，恒指最低17859，20日線喺18096，但收市總算上番去，力保不失。若守得住，大勢未變。
大市氣氛明顯轉淡，下跌正股數目大增，超過900隻，而上升正股得番159隻，利來控股（221）係其一，收0.51元，升2仙，連續兩日成交大增到2億股，升勢會一觸即發，噚日最高已見0.57元。
利來原本做肉類銷售同中港物業發展和投資，但今次有大動作，將變身做資源股，且一口氣進軍兩大資源業務，包括林木業和煤鐵礦業，前者盈利非常豐厚，三幾年間便可回本。利來今次係分別「夥拍」兩大資源項目的公司，仲有大隊專業團隊一齊上馬，業務前景會有一定保證。
先講林木業，利來收購一家在巴布亞新幾內亞擁有林木資源公司PNG51%權益，作價3680萬元，另提供7750萬元股東貸款購置設備和機器。PNG擁有Maimai林地自09年4月3日起計50年的伐木特許權，其總土地面積為23.98萬公頃，估計木材數量為1017萬立方米。1公頃等於1萬平方米，成個林地即係有24億平方米咁大。
續物色自然資源項目
根據行業的評估方法，平均每一立方源木的FOB價約150美元，以總儲量1017萬立方米計，總價值為15.2億美元，約117億港元。開採一個大型的林場，通常第2年收支可平衡，第3年會有盈利，以PNG的林場計，第4年已可提供盈利逾1億元。
第2項交易，係利來同新加坡上市公司Abterra換股，各自持有對方4.8%權益，利來股份作價為0.435元。Abterra主要業務為於澳洲、印度、印尼及中國買賣煉焦煤、焦炭及鐵礦，去年底結算市值逾10億元。
利來目前正在亞太區物色自然資源項目，與Abterra結成策略性聯盟，將可利用Abterra在有關領域的經驗，加快在煤鐵礦開採業務的發展，公司收益亦可大幅提升。
郭兆誠