今日係騰訊（700）上市5周年，今年亦係公司創辦十周年，大家可能估主席馬化騰會call齊班鄉親父老慶祝，然後開香檳高呼「人生有幾多個十年」！
唔係咩，單係公司股價就已經夠佢光宗耀祖，當年今日，憑住兩隻企鵝Q哥哥同Q妹妹，騰訊以3.7元上限價掛牌，反應熱烈唔在講，好快仲上到十幾廿蚊，然後喺呢幾年，經歷沙士同金融海嘯，都仲係咁拾級而上，去到噚日已經係89.2元，真係乜指物指都跑贏晒！
咁今日會有乜慶祝活動呢？小馬哥噚日同華華講，話佢一向唔興，今日仲要開會㖭，呢啲就真係「真正低調」潮州人作風。咁10年過去，心境有冇變化？佢話最大變化係以前諗溫飽問題同點樣生存落去，家就係做生意打關係，對於搞開技術嘅人嚟講係幾難，總之每日都有好多新挑戰喎。