外圍市況氣氛麻麻，港股噚日跌近400點收市，不過成交好奀，唔夠654億元，市場觀望氣氛濃厚，A股晏晝造番好，以近全日高位收市，如果今日繼續炒上，有望帶動港股回升。
近排樓市表現唔錯，但係地產股早前已大幅炒高，家仲係調整緊，遲啲跌到落支持位可以再吼過，現時較具值博率都係內銀股，中行（3988）調整就完，可留意相關C輪。
中行C輪16669：中行昨收3.69元，跌唔夠1%。上周股價見過3.82元，升破呢個位可以延續之前升勢，睇4.35元，可以諗吓隻C輪16669。
隻輪現價48.5仙，2009年10月12日到期，行使價3.38元，溢價4.7%，引伸波幅49.1%，槓桿率7.6倍（有效4.7倍），正股升上4.35元，16669有機見97仙，正股跌穿3.50元，就沽咗隻輪止蝕。
俊樺