唔怕你知，佢喺屯門屋邨大、十零歲無所事事跑去跟人學跳舞、為攞獎多次參加歌唱比賽。最怕你唔知，佢靠舞賺生活費，舞到組「軍團」……係邊個？狄易達（Dat）。由十零歲跳舞跳到家廿歲，學生多到組成「狄易達軍團」出騷表演，短短個多小時訪問笑不停，雙手雙腳動不絕。坦白講，家仲有幾多個小伙子有問必答唔造作？
記者：梁美甜
攝影：楊錦文
服裝提供：abirato、CreamSoda
鞋：Reebok
錶：TechnoMarine
車輛提供：AutoSportivaLtd
周身郁笑唔停
問Dat仔有咩DreamCar。「C-class又或者HondaSpike！」嚇嚫，後生仔竟然唔係揀跑車？「七人車都好，最好係一坐上去就舒服到瞓得着，載得人多，我屋企人多，又載到好多嘢，我平時練習登台好多隨身物品……」Dat仔應該係個踏實顧家小伙子。話口未完，佢已跑去保母車揹「隨身物品」而至，除咗個大背囊，仲有結他，「學緊，成日練！」佢話「成日」，我信，因為喺採訪過程中，佢嘅手指、身體，甚或雙腳都郁唔停。坦白講，安排呢個採訪一啲都唔順利，Dat仔早就度好期，可惜借車過程極不順利，最終根據Dat仔要求，找來「性能車仔」Fiat500Lounge，不過就連天公亦不造美，整日大雨，Dat仔依然笑逐顏開，還興致勃勃左摸右摸，「個音響系統幾好……我好鍾意天窗。」
舞出軍團
記得當我向老細滙報想訪問狄易達，在場同事都異口同聲：「跳舞好叻嗰個？」原來Dat仔幾乎同「舞」畫上等號。「我細個住屋邨，無咩嘢玩，喺公園見到成班大哥哥跳舞，就膽粗粗叫哥哥教，就一路跳到家！」唔知係咪因為咁，Dat仔亦毫不吝嗇地教其他人跳舞，其中一班學生更係一般人眼中嘅壞分子，但就藉舞蹈重回正軌。直到現時為止，究竟Dat仔教過幾多學生呢？「無正式統計過，或者有200多個吧！」兩年時間教咁多？仲邊有時間兼顧事業呀？你仲好似有個「狄易達軍團」？「家無時間返去（新界北）教喇！軍團嘅成員會同我一齊跳舞，更會一齊出騷表演，嚟緊嘅九月份仲會公開招募團員㖭！」話題一轉，「試一轉Fiat有幾高性能……」未講完人已經上咗車，搞笑。
試車時，Dat仔一樣表現貪玩本色，天雨路滑一樣盡情踩，結果車速高時甩咗好幾次，佢就超興奮：「好正！」試完車落地，「成日見人推車，係咪真係咁易推呢……咦，真係推到！」結果就推咗成百米先推返轉頭。我投降，認老！
後記
無怨跳足50次
好多人將Dat仔嘅舞技同陳偉霆相提並論，我就請Dat仔喺Fiat500前後左右展示舞姿，但雨太大，車身濕滑，動作變得甚有難度。結果為影一張大相Dat仔跳超過50次，不過無黑面無怨言，仲笑得好開心。攝影師都受感染，無懼雨打濕身，趴地狂影，人真係可以互動，情緒亦可相互感染，大雨下大家都玩得好開心。
規格
引擎：1,368cc直四
馬力：100bhp/6,000rpm
扭力：131Nm/4,250rpm
傳動：五前速Dualogic加減波
售價：$149,800
查詢：愛快汽車（23051155）
